للبرد قرصات ليمن شامل الغربة
وين الدفا والمسافة ليلي الحافي
الليل سارق نهاره والصبح كربة
يا قسوة الوقت والاقدار للدافي
البوم عادى الغراب وحاد عن سربه
والريش هد الجناح المتعب الجافي
والشوف عاف البعيد وخاير القربة
والضلع احنى عزوم الوقت للنافي
والرجل ما عاد تقوى تطحن التربة
والدرب مقفر هجير مثر سهافي
والذاكرة ل ناضب الاحساس مغتربة
دود الخرف ياكل الموجود واللافي
والنفس لو جات تسلا ما لقت طربة
ضاقت م بين الهموم مساهر وغافي
عطشى حذا اليم لكن عافت الشربة
من المحاوس تكدر غدرها الصافي
تعاين النو متبني وله قهبة
امطر جنوبي ولا واديه ينلافي
وصدوف الايام تهدفها على الحربة
من طعنة الوقت يالله الجابر الشافي
تبقى المواثيق في شف الغلا ذربة
ترجح موازينها عن عومة الطافي
مساير العمر درب وللمدى دربه
والراحله اودعت في رحلها سنافي
الحمد لله رجيته طالبن قربة
الوافي الوعد يوم يخلف الوافي