نخليوها هي تختار
تقدر قيمتنا وتحكم
هي مولات الشوار
تختار بلا ما تندم
الاول
انا رمنسي وقليبي حنين
نعشق السهر فضي النجوم
ولي ضاربني ضاربني علزين
وانتي حبيبتي وانا فيك مغروم
نهديلك كل نهار مشموم
ومعاه قصيدة من اشعاري
ديري ما تبغي ما تسمعي لوم
وانا نبغيك مراتي وعمارة داري
الثاني
وانا انسان دغري وفكلشي عملي
وقتي بالدراهم ولمكسب محسوب
ما اناشي للحب ولغرام مسالي
اي انسانة توفي بالقصد والمرغوب
بالمودة والرحمة نبنيو اسرة
وكل واحد فينا عارف ما يدير
مع الوقت نتوالفو وتزيان العشرة
كلشي فالدنيا فحسن التدبير
هي
فهذ لكلام ما عندي ما نقول
كل واحد فيكوم عندي مقبول
انما ما تمشيش الحياة بلا رمنسية
ولمرا تقبل تكون مهجورة منسية
انا نبغي نعيش وقتي بعقل وقلب
نتحمل المسؤلية وفنفس الوقت نحب
الحياة جميلة باستقرار الدار
واجمل واحلى بتوافق الافكار