فيني قلبٍ صابته مليون علّه
وظنّي إن الموت بالعلّه الأخيره
علّة اللي راح تارك قلب خلّه
يكتوي ما بين جمراته وسعيره
أدري إن لي سابقه بالكذب كلّه
وأدري إن حبال هالكذبه قصيره
هاك سيف الحب يالغالي وسلّه
وأطعن اللي خان في ليله أميره
يا أغلى قنطارٍ شراعك لا تفلّه
خلّك بمرسى عيوني المستديره
إيه أنا المخطي وهذا القلب ذلّه
هين أبوه وخلّ به العيشه مريره
هين أبوه وحط همٍّ به وشلّه
ثم ردّ وحطّ حرّتْكْ ابغديره
بس تكفى لا تشح بالوصل كلّه
مُرّْ عليّه وناظر بعيني الضريره
مُرّْ عليّه وصافح فؤادي وقلّه
كم خطا يومه استهان بهالكبيره
يوم خان وهالخيانه إيه.. بالله
آية اللي نافق بقوله عشيره
ودّي أذرف دمعٍ بعيني وأهلّه
لين ما تكمل دموعي الغزيره
نادم وأدري الندامه ما تظلّه
اللي ضيّع قمرة بليله منيره
تضوي سكّاته.. وتضوي له محلّه
ولمّا راحت أظلمت به كل ديره
ودّي أرجع بالزمن وأمحيها زلّه
وأرجع أحضن سلوى للمرّه الأخيره