ما عاد أجامل ولا أحسب رضى الناس
من كثر ما شفت بالعالم سماجه
في منهج الزور ماشي على ساس
ذا يمدح الصقر ويذم الدجاجة
والصقر واش مكسب أهله غير الإفلاس
يتعب مربيه من كثر احتياجه
غالي وحتى لباسه قيس قياس
ونافخ وفوق السماء يرفع حجاجه
وأكبر مثل طير بن برمان قرناس
اللي تربى على دروب العواجة
يجيب حيه ويلقيها على الراس
لا بارك الله بسعيه والدواجة
وإلا الدجاجة مليئة طيب وإحساس
تشبعك بالبيض وتزيد اللجاجة
والديك له صوت زين وقوة وباس
ويناقر الخصم ويثوّر عجاجه
صراحه إني غديت الفكر محتاس
وأفكر أحيان تفكير الخواجة
الكلمة اللي تضع ما بين الأقواس
تشغل الفكر وتزيد اختلاجه
واللي يفكر بعقل يجيه وسواس
ومن يتبع الصدق ما يلقى خراجه