يالله من بأمره الشر والخير
بيده يفك الباب ولا قفوله
يامن حفظ يوسف على جمة البير
وأخرجت يونس من بحور مهوله
يا عالم بالغيب يا رازق الطير
ارحم ضعيف طاح والموت حوله
والموت حق إن جاك ما فيه تاخير
يجي على حينه وساعة وصوله
قالوا هبل يمشي دروب المخاطير
لوكان يمشي مع دروب السهولة
قادتني أقدامي بدربي وأنا سير
وكم واحدن مثلي تقوده رجولة
والقادر الله ما نقول المقادير
يا كم سبحنا البحر عرضه وطوله
ويا كم عثرنا وجنبتنا المعاثير
ويا كم جهلنا وكل نفس جهوله
ويا كم مشينا في صفوف الطوابير
والرزق لو ما كتب لك ما تطوله
ويا كم خسرنا ولا حسبنا المخاسير
وكلن على أهدافه يسير ذلوله
وأعمارنا وأيامنا في تدابير
والحق ما يخفاك لو ما تقوله