ياالله ياواحد ياعالم كل ماتخفي الصدور
ياذا الجلال القادر المتعال .. رب العالمين
يامن بأمره تسبح الافلاك وبطوعه تدور
تهديني لخير العمل وإنك على الطاعه تعين
جيتك وتعصفبي رياح الخوف وعظام الامور
يااللي ليا شانت بي الدنيا على يدينك تزين
ياذا الكرم زيّن ملافينا .. بأنوار وسرور
في يوم توزيع النتايج والمصاير به تبين
اما سعيد .. يعيش في جنات وأنهار وقصور
ولا شقيٍّ .. والمآل النار مهد الكافرين
ياجاهل الدنيا تراها ماسوى مْحطة عبور
لابد من يومٍ تُسمّى ضمن ركب الراحلين
كسبك بها رْضا الإله وعمر بالذكر مْعمور
وبمعصيته .. المغتني يبشر بخسرانٍ مبين
واللي بها مُسعد هو اللي لايتكبر لايجور
يكون فيها فاز بالثنتين في دنيا ودين
لايظلم حقوق البشر سالم من نفاق وغرور
متحلي بنُبل الخلق يحمل صفات المؤمنين
على خُطا خير البشر يمشي ولايمكن يحور
هو خير قدوة للهدى .. نور وشفيع المسلمين
هو الذي عرّف لنا المسلم ونقشٍ بالسطور..
من يسلم من لسانه المسلم ومن بطش اليدين