أبي تعتقني من حبّك دخيل الله لو ترحل
وأنا أوعدّك ما أفكّر أدوّر حب من ثاني
وإذا أنا جيت في بالك طلبتك عني لا تسأل
أبي أرتاح ما ودّي تهيّض فيني أشجاني
أبي أذبل مثل ما هي جناين حبّنا تذبل
وأبي أنسى فرح قلبي وأعيش بموطن أحزاني
بقول لك شي لو قلبك بعلم العاطفه يجهل
قتيل الحب أنا والله بشوفة عينك أحياني
تمنينا علاقتنا تدوم وحبّنا يكمل
حسافه ما تهنينا وجييتي تقولي إنساني
قبل لا تقولي الكلمه أبيك تقولي وش أجمل؟
إذا كان الغلا تربه سقتها دمعة أعياني
بداخل جسم محبوبك من الأعلى إلى الأسفل
تمسكن حبّك بذاتي وعاش بنهر شرياني
حرام تموت أمانينا وحلم البارحه يقتل
وحرام يعيش كل واحد بعيد وخلّه يعاني
بنادي ومدري إن صوتي إذا ناديت لك يوصل
أنا شاعر مسا ساهر وتكوي قلبي نيراني
أبي أشرب من الكاسه أبي من حبّنا أثمل
وإذا رحتي أبصرخها.. حبيب القلب خلاني