مهما رحتى

مهما رُحْتِى

ومهما غِبْتِى

يا حبيبتى انت حبيبتى

ومهما الدنيا عليا تقسى

قلبى عايش ليكى انت

ياللى جوه القلب قاعده

ياللى دنيايا سِكِنْتِى

فاكره أول ما التقينا

كات قلوبنا ملك لينا

فاكره أول مره فيها

قلت لك انى بخاف

لو أفارقك يا حبيبتى

قلتى ليا ما اتفارقنا

وعدت الأيام علينا

بس كات أيام عجاف

عدت الأيام حبيبتى

وحبى ليكى كان يزيد

وعنك ياما فضلت أدوّر

لجل أشوفك من بعيد

يوم ما شفتك عمرى نوّر

يوم لُقاكى كان لى عيد

قلبى قاعد ف انتظارك

نبضه حزين نبضه شريد

ياللا عودى قوام يا حبى

ياللا هِمِّى ولم تخَبِّى

حبك اللى ف الوريد

انت عمرى وجوه قلبى

انت مرسايا الوحيد