سلمي حبيبتي يا اجمل غنوة
نبضة قلبي وروحي الحلوة
مهما الدنيا ف. عيني تنور
نورك يفضل ساطع جوه
مهما راح أوصف فيك وأقول
واكتب فيك كلام معسول
عمري ما حقدر أوفّيكي حقك
علشان طبعك مش معقول
سحر عنيكي اللي مجنني
لما تكوني قريبة مني
وبنتكلم وبنتحاور
وأما تنامي غزاله ف. حضني
بيني وبينك عمري ما أصدق
إن العمر بيجري ويسبق
والبنت اللي زمان بشريطه
كبرت والأحلام تتحقق
كبرت صارت أحلى عروسه
بسم الله م. العين محروسة
عمر ما مشت في طريق ضلمة
ولا خطاويها كانت معكوسة
علشان ربي الحارس ليها
ومبارك دايما خطاويها
علشان سلمى البنت السكر
بارة بوالديها وأهاليها
والليلة جت ذكرى ميلادك
ويا رب يكتر أعيادك
وأشوفك في الكوشة عروسة
وافرح بولادك وأحفادك
مهما تجيلك أغلى هدايا
ليلة عيدك وانت معايا
مش أجمل من دعوة جميلة
مصحوبة بحبي وبرضايا
ويا رب تبارك في حبيبتي
سلمى الوردة اللي ف. جنينتي
ويطول عمرك يا ضنايا
دانتي النور في عيلتنا يا بنتي