ياشعر مبطين انا وانتَ خليل وخليل
اكتبك من حزن من فرحة مديح وغزل
لكني اشعر بأني ماجنيت الحصيل
ناقص.. لأني نقصت في حق غالي كمل
لكن عذري.. بأني كل ماقمت أخيل..
براق فكره.. احاول بس خاب الامل
عشان من قدره بقلبي.. أعز النزيل
صوته زهور لحياتي صوت غيره محل
اللي تعلمت منّه.. أنْ لامستحيل
والامر مهما صعب يحتاج حكمة عقل
ياذخري اللي بك أطاول شموخ النخيل
يااللي جميلك عليّه.. ماتحَمْله زمل
إسمك وسامٍ على هالصدر وأغلى مااشيل
ذكرك ينومس.. ياذكرٍ للمعالي وصل
ياعقل ثابت.. بوقتٍ به عقولٍ تميل
تقنع به العاقل ويَكرم عن اللي جهل
هذا أبوي الرفيع الشان.. هذا الاصيل
هذا السند.. ذا قراحٍ منْه فكري نهل
ياعزوتي ياغناتي.. حب ماله مثيل
ياقدر عالي.. ودونه كل قدرٍ أقل
أشهد بأنه قصوري معْك ماهو قليل
لأن قدرك كبير.. وشامخٍ كالجبل
وادعيك ياالمنعم المعطي ومدك جزيل
يامستجيب الدعا سامع دبيب النمل
تشفي أبويه وكل الباس عنّه تزيل
ياجاعلٍ من عسير الامر يُسر وسهَل
وتنعم عليه بفرح قلبٍ وعمرٍ طويل
يارازق الخلق.. رزقك كالمطر ينهمل
والشعر مهما كتبته أو اشوفه جميل
قدام هيبتك ياأبوي.. يتلعثم خجل