جيت كلي ولا خليت مني شي
ورحت واللي معي مبداي وأخلاقي
يا دروبٍ توديني ماهي بيْدَيّ
ليت قلبي ولو مره ثنى ساقي
لو قسى الوقت يا رجّال ماهي هيّ
يبطي اليأس ما يستوطن أعماقي
يوم مديت لي من عزم روحي فيّ
ما تضيع الهقاوي من يد الهاقي
لو تساوم جروحك عزم روحك عي
في مجامل جروحي ويش أنا لاقي
غن يا هاجسي والحرف ماهو غي
ما يجف القلم في موسم أوراقي
وأنت يا نبضي اللي في خفوقي حي
لك يحن رْعَدِيْ ويلوح براقي
كل مالك تزود وهم ما غير شويّ
جعلهم يبعدون ولا لهم باقي
يبدي الصدق في وجه الليالي ضي
وينفضح ليلهم في لحظة إشراقي
كم تجاوزت عذر وجرح قلبي نيْ
لين قلبي لقى لي عذر لفراقي
يشرب العرق لين أروى ضماه الميّ
وتجدب الأرض والشرهة على الساقي
انطوت صفحة الماضي بأهَلْهَا طي
يكفي أني صبرت وعشت بأخلاقي