الصبر من صبري اشتكى

الصبر من صبري اشتكى.

جاني يطبطب ع الوجع.

ويضمني ف حفلة ألم.

ودموعه نشفها البكا.

برّق.. وثار.

لما لقاني بابتسم.

وابدر تقاوي الحلم ف غيطان الأمل.

حبة يمين.

حبة يسار.

من غير ملل.. مهما تعاندني السنين.

وتجور على القلب اللي كان للكل أأمن متكا.

لو دار زمانه عليه وجار.

ومدار يسلمني لمدار.

وان مات في أرضي حلم واحد..

.. أدفنه.

وابدر على قبره تقاوي كتيرة..

وارويها انتظار.

واجري بلهفة قلب عاشق..

.. حلمه بيعاني احتضار.

ربك كريم.

هو اللي بيخط الأجل.

لسه النهار الحلو جاي.

ودموعي في عيون لهفتي..

.. صبحت منار.

شعّت على عمري خضار.

طارح عناقيد الأمل..

.. متشعبطة ف أبعد مسار.

ومسار يطوحني لمسار.

والصبر كان غربة.. وضُليلة.. وتمن

والحلم بيك..

.. شايله أنا في كل ذرات البدن.

قبل السنين ما تكون أنين.

والبومة تسرق فرحتي.

والنور يغيب من سكتي.

والتوهة تعملني وطن.

والحلم كان دايما جمييييل..

.. زيك كدا

يشبه براءة ضحكتك..

... لأ نظرتك..

.. والطهر موج مالي العنين.

منقوش على جبيني فرح.

بيشِع نوره.. يبتسم.

نايم في نن العين.. أمين.

حارس خطاوي رحلتي..

... ومادد على عمري سعادة.. وازدهار

لون البراءة والسعادة اللي ف عنيك..

... يا عم زين.

يا أحلى حلم حلمت به..

.. من قبل تأميم المنى

من قبل تحريم الحرم.

من قبل ما القلب الحزين..

.. يعزف على وتر الألم.

والبوم يحاصر زرعتي.. بغِلّه الدفين.

واتغيرت كل الوشوش في ليل ضنين.

واهو فات عيدين...

... من غير ما ياخدك قلبي في حضنه..

... ومن عطرك يشم.

أو حتى تروي ضحكتك عمري الحزين.

أو.. أسمع اللحن الجميل وقت البكا.

ياااا أحلى حلم حلمت به.. طووول السنين.

يا حلم زيييين.

الصبر من صبري اشتكى.

جاني يطبطب ع الوجع..

.. ويضمني ف حفلة ألم.

يسألني.. جبت الصبر دا كله منين؟!.

ودموعه نشفها البكا.

وانا لسه صابر.. مبتسم.

وابدر تقاوي الصبر ف غيطان الأمل.

من غير ملل.

مهما تعاندني السنين.

فالصبر زيييين.

ياعم زين.