الشعر ينبض والدواوين كتّاب
والعزّ دوّنته صحاف المكاتيب
اكتب على المسحوب واشدّ الاطناب
واحطب هجوسي واوقده بالمشاعيب
عانيت من بعض المواقف والاصحاب
عند الوفا والطيب واغلى المواجيب
الطبع عرقٍ وسطه الدم غلاّب
والقلب نبضٍ ياخذ الدم ويجيب
اما يسيل الدم بالطيب منساب
والا يجفّ الدم والعرق وتخيب
والصيت ذايع بالمجالس والارحاب
والرمح من ركزة يدين المحاريب
ياصاح حذرا تتبع حذي الاذناب
وان كنت ذيبٍ لا تعاوي مع الذيب
بعض الذيابه تحترف غرز الانياب
وبعض الذيابه ما تحب التجاريب
وبعض الذيابه همّها فتل الاشناب
والقلب خاوي والخطا بالمحاسيب
هذاك همّه طيحة اعلام وانساب
وذاك همه نشرة الزّل بالعيب
ماني من اللي يحسبون العطا شاب
الاّ صبيٍ ما يخبر الاجانيب
وقلّ الوفا سمٍّ ليا جاك تنصاب
ما ينزعه عنّك طبيبٍ ليا صيب
وعشق الصبايا تبتدي بنظرة اعجاب
ياكم عذرى طيّحت بالاشانيب
هذاك سايم وافرق السوم كذّاب
وذاك هايم في غرام اللواعيب
قلبه تعلّق في غرامه ولا طاب
يدري بخافي نيّته عالم الغيب
وان جيتني تشفق على طرق الابواب
ارفع يديني عن سفاه المطاليب
لا صرت تخفي وجهك بوسط سرداب
الشمس تكشف خافي الوقت والريب
عزّ المبادي ما تغيرها الاشواب
غيّر جبل واذهن تغيّر اصاليب
والصاحب اللي عزّته تعتق ارقاب
لامن تزهّل لازمك والمصاعيب
حرٍّ ليا هدّ المعاليق ماخاب
صاد المراجل والمواقف معازيب
وان قالها تكفى وطالبك مرقاب
قلت ابشر ابعزك وتبشر على طيب
به صاحبٍ يدهن جروحك بالاطياب
وبه صاحبٍ لا رحت تدمي العراقيب
كلٍّ على فعل الملازيم طلاّب
نفس المبادي باختلاف الأساليب