ياوجودي كل ما قفت نجوم الليال
وجد من دارت رحى دنيته من بين ايديه
ويا وجودي وجد منهو بساحات القتال
يوم عجّ المعركه ماتوا اخوانه وابيه
ووجد من يحسب سنينه وعمره في زوال
حين يكبر والمرض زاد لحظتها عليه
فاح قلبي فوح بنٍ تزل ابْها الدلال
يوم هاض البال والحزن شعري يهتويه
يا غرامي.. حار بالي يمينٍ في شمال
وين ذاك القلب والشوق والحب النزيه
وانتي يالودّ الذي شقّ صدري.. شقّ شال
من عقب ماكنت شوقك..و شوقي ترتجيه
ياعذابي لا غدا الوصل مقطوع الحبال
والجفا والبعد والصد كله تحتويه
عادتي لا صدّ عني..رفيقي في قبال
اتركه.. ويشوم قلبي عن الطبع السفيه
والله ان عزي بقومٍ يضاهون الطوال
فوق هامات الفعايل صداهم تعرفيه
قلت جعلك في فراقٍ ولا عقبه جدال
لا اشتهى قلبي وصالك.. ولا عدت احتريه