بالرغم من هالكم من كم الأرقام
مابه كفو لا أقبل الهم والضيق
شيخان مع ضباطنا الدون الأقزام
عند السوالف كل أبوهم مطاليق
ماقول كلهم لكن اكثرهم أصنام
ولا شك تبخصهم جميع المخاليق
مهما تجملهم منصات الإعلام
ماهو يزيّن قبحهم أي تلفيق
خصوصاً الطقعان والمرخي حزام
ما فيهم حمية وحثالة وزناديق
زودٍ على طبع الردى وفكرها السام
ما يطهرون إلا لفرز وصناديق
تعقب هقاويهم حلم مدري أوهام
واشكيهم الله يوم ما يابس الريق
والله لو ماني على دين الإسلام
وتردّني شيمه ومبدا ومواثيق
لاخط قافٍ يقلب القوم لا أقوام
قافٍ أطيق وقاف ما والله أطيق
للي بمناصبهم رقوا دون الأقدام
وأنا مكاني فوق روس الشواهيق
منظر وراي ونظرتي دوم قدام
إن غربوا وجهت أنا السير تشريق
ويحرم عليها تذلني سود الأيام
لاقف لها ومن دونها كني طويق
وقفة سِطر وشموخ واشوش ما دام
هاذي هي الدنيا حظوظ وتوافيق
شاعر وفكري عجز أوراق وأقلام
رغم انف كل الضيق وحظوظي السيق
هذا ورغم الكم من كم الأرقام
لسبدّ من صاحب رقم يوم ويفيق