غبتي وشعللتي بي انواع الافكار
واصبحت تايه في بحورٍ عتيمه
اشغلة كل الناس ادور للاخبار
وضعك يهم انسان روحه يتيمه
اشغلتني واشعلت في داخلي نار
وخليتني ظايع وحالي سقيمه
وجيتي بعد طول غيابك والاسفار
والحمد لله يوم جيتي سليمه
مشاهدك يسوى من الناس مليار
ويسوى حياتي والعقول الفهيمه
واللي خلق يابنت الاجواد الاقطار
ان شوفتك عندي لي اكبر غنيمه
ان كان لي عندك معزه ومقدار
انتي لك بقلبي محبه وقيمه
وان كان ميثاق الغلا فيه معيار
تراك ميثاق الغلا يالحشيمه
بيني وبين الهم دورات وادوار
منهو يوقف للجروح القديمه
انا عظيم الشوق تايه ومحتار
ابطيت انا ادور لشوقي عظيمه
وترى المشاعر ماهي بلعبة قمار
ولاهي بتحجيره وكذبه وخيمه
ولاهي بناية مع بطى الوقت تنهار
احساس صادق بين قلب وغريمه