ناداني الشوق وانا غايب
عن الأحباب
وشوفت الفرحه نسياني
بين الأغراب
لافرح معايا يسعدني
والا اللي غاب
شكيت للناس وماسمعتش
لحد جواب
رجعت لوحدتي ابكي
وحالى حزين
رجعت اتذكر أيامي
وأحلى سنين
لقيت الذكرى بتزيدني
عذاب وأنين
وأنا اللي كنت باتغنى
باحلى رنين
لإمتى يادنيا واخداني
بعيد عنهم
وانا اللي كنت باتشرَّب
حنان منهم
يادنيا جاوبي وكفايه
عذاب ومرار
عشان اكتب بأحلى كلام
واطمّنهم
والاقي الدنيا بتجاوب
ياعيني عليك!
عذاب البعد ومراره
دا كان بايديك!
حياة البعد مختارها
بكل رضاك
وجايني بتشتكي مني
وعايزني ارضيك!
رجعت لوحدتي تاني
وقولت يأاااااه
فين ارضك حبيب قلبي
ياأغلى حياه
ولما دموعي جات تنزل
سمعت الباب
لقيت ساعي البريد جايني
وجوابه معاه
فتحت جوابه قولت أقراه
واتصبر
لقيت شوقه قصاد شوقي
ماتتصور
لقيت الكلمه في جوابه
تقول بلسم
لمست حروفه بلساني
تقول سكر
مسكت اوراقي واقلامي
بلملمهم
كتبت كلام واحلى كلام
بغازلهم
ناديت ساعي البريد تاني
وقولت تعالى
وخد جوباتي يالا قوام
ووصلهم