على المغرَب اللي يذكرونه نويت اروح
واطفي لواهيبٍ بقلبي لها عامين
وامتع عيوني شهر في الصاحب المملوح
حبيبٍ سرق قلبي بصوته قبل يومين
حبيبٍ سواليفه دلع يا ملا ومزوح
كوى خافقي من نظرته ياعرب بالعين
تذكرت نظراته وذاك الشعر مسفوح
على خد من صوب ضميري ضحى الاثنين
كواني بناراًخلت القلب فيه جروح
وصوب ضميري ياعرب ناعس الطرفين
وساعة زهمته وحبنا بيننا مفضوح
حطيت يديني بيدي ناعم الكفين
جذبني بعطره يوم قرب شذاه يفوح
ابوجادلٍ من طولها يكسي الردفين
يقول اش تبي قلت انت حلمي ياعذب الروح
انا ارجوك قلي ديرتك يابيض الخدين
انا عندي احلامٍ كثيره بكل طموح
ازورك لو انك ساكنٍ في بلاد الصين
وقال الحذر عن سرنا يالحبيب البوح
ابي سرنا ياصاحبي بيننا ياثنين
مادام ان مالك عندنا يافتى مصلوح
ترفق بروحك بعد بكره ترى ماشين
وقلت الحقيقه لي شهر يالغضي مطروح
ولاهي عداله تجرح القلب بالسكين
انادي على شانك وصوت السهر مبحوح
متى ياعلي تهنى بها حالة المسكين
وانا مؤمنٍ باللي كتب لي بوسط اللوح
وحنا بكل اللي كتب ربنا راضين
ورد النظر ويقول قلبي لكم مجروح
الا يالكثيري ولعت بالحشاء نارين
تفضل ترى بيتي وما نملكه مفتوح
وفي ظرف ساعه انقلب عيدنا عيدين
يقول انت سامحني وانا اقول لك مسموح
جلسنا ثواني وانقلب ليلنا ليلين