عن الغلا يابنت لا تنشديني
وعن موقعك لا تنشدي شخص يهواك
ياغاليه بالصدر مره احضنيني
خليني اهنى الحب واعيش وياك
لا ياحياتي سكنتك بحجر عيني
من كثر حبك والغلا ما اقدر انساك
اقول كلمه بس ابي تفهميني
ويلاه لاقلبي ذكر بس ممشاك
حبك نقشته ياقمر صدقيني
وسط الحشاء مايعرفه ذا ولاذاك
اسرح بفكري يم دارك ضنيني
يمك ولا ادري لين اقبل محياك
اسرح بفكري والملاء نايميني
وانسى ضيوفي واحتفي دوم بالقاك
اسرح بفكري بس ما تدركيني
اذكر سواليفك وقبلة شفاياك
انسى الاهل والربع ساعة تجيني
وانسى حياتي لا تذكرت طرياك