اللي طعني طعن جساس لكليب
عفيت عنّه لجل عين القبيلة
وش عاد لو سوّت يمينه من العيب
حنا الردي لاطاح منّا نشيله
ياللي تدوّر بي عيوب وعذاريب
ماني بقايل لك تراها قليله
من مولدي لما كسى راسي الشيب
ما خنت جار ولا مشيت الرذيلة
لكني أتعب في دروب المواجيب
وان جاني المحتاج وفيت كيله
نعطي خفا نقرض بها عالم العيب
ولا ندور من وراها نفيلة
ما نشرب إلا صافيات المشاريب
ولا نعطي إلا الوافية والجزيلة
وأنته وأنا يا من شربت الدغاليب
انشهد أنك ما فعلت النفيلة
ما فيه شيّ يجمع الكلب والذيب
واثنينهم يرجع لنفس الفصيلة
لكنها هقوة عطيب المضاريب
مخالبه مثل السيوف الصقيلة