ياصاحبي لو لك على الروح بصه
صارت قفر من بعد وديان وانهار
بين الجروح وبين الاهداب قصه
مثل الورق والحبر واحساس شعّار
وبين الحنايا والصدر الف غصه
شهقة انين وزفرتن من لضى نار
والصبر وينه! ملح وقد ذاب فصه
ياعزتي قلبٍ من الهم محتار
كن الفرح في دنيته ما يخصه
اربع غدوا ليلٍ والاوجاع سمار
والضيق شيّد به صروح ومنصه
غيمة عنا لا ماتبي غيره امطار
وش عاد باقي ما خذا منه حصه
مجلس كريمٍ والتصاريف خطّار
ياصاحبي قلّه: وبالله وصه
لا ذقت مر الوقت. إياك تنهار
مدام كوبك ممتلي منه نصه
كنه مع اهل الكيف من بن وبهار
وقلّه حبيبك جار وقته ورصه
يموت واقف مانحنى مثل الاشجار