نسيتي ياعطر السنين
وإلا ذكرتي شاعرك!؟
ليتك مع النسمه تجين
ب حجر عيني اسهرك
الغيم بلّلني حنين
مع كل قطره اذكرك
يرعد ويملاني انين
بوسط صدري بعثرك
كني اشوفك: ترسمين
وأسمي يزيّن دفترك
مسكين هالدفتر.. حزين
بعضه يشابه اكثرك
ليمن نويتي ترحلين
للموعد اللي ناطرك!
اطري عليك.. وتذكرين
اللي جهلك وفسّرك
قدّم لك الدنيا.. يدين
غيمه: تظل، وتمطرك
زرعْك فُل وياسمين
عن كل خطايا طهّرك
عصفوره بغصنك سجين
محدٍ بقلبه شاطرك
قطف لك الدر الثمين
ولكل مواني سافرك
سمّاكِ.. السر الدفين
اللي حياته خنجرك
هذي سواة العاشقين
ياكل قصايد شاعرك
الغيم.. رجّعني سنين
ماضي غديته حاضرك
وان كان في بالي تجين
روحي.. ولاني جابرك
فاقد الشي ب يبين
وان مارجعتي.. عاذرك