ليت المرض ينقل عن اللي نودّه
والله لاشيله عن غلا الناس سلطان
شيخ جميع الناس ذخر تعدّه
إن ضاقت الأيام واشتدت أزمان
ملجا الرفيق ومن بعد كان ضدّه
حتى العدو ينصاه لي ضاق به شان
محدن وصل بالجود والطيب حدّه
وانا اشهد إنّه أكثر الناس إنسان
كم واحدن عن لحظة الياس ردّه
حتى زرَع له بالأمل روض بستان
أمّا الشجاعة فاسأل اللي يندّه
وعزّي لمن لاقاه سلطان غضبان
يمناه إذا همّت بحصنن تهدّه
ويسراه ياما عدلّت راس غلطان
وكلن عطاه الله من الحمل قدّه
ونصيب ابوخالد هزع كل ميزان
وتضحك لها عينه وسنه وخدّه
ما كنها إلا ريشةن شالها حصان
ياالله ياربي من العمر مدّه
كم عين محتاج ترجله باحسان