مالي ومال اللي عن الدرب لاهين
لي امنياتي وكل شخص ومناته
اقصى شعوري احمله بين قوسين
يفني بها عمره يدوّر نجاته
غيري يشوف الحب لا ارض لا دين
ويشوفه اجسادن ويحصي صفاته
وانا على صغري وذا العمر شبرين
خوفي على قلبي لو العمر فاته
يموت موت الردي من دون تكفين
محدن درى موته ولا اكرم رفاته
دنيا عصيبه تحمل الزين والشين
يا بخت من شاف المحبه صلاته
يرحم ابويه الي فطمني على الزين
ع الخير علمني وقضى حياته
وانا على نهجه ابمشي وذي العين
تمشي حسب شوره وتتبع وصاته
علمتني والحين انا بنت عشرين
يا بوي ابرفع راس عزك وذاته
واخلي من شافني يتعوذ الفين
من طيبة اخلاقن تِخثر سواته
لو وزه الخافي على الشين في حين
يحسب بأني واحده من خواته
يخاف في عرضه تجيه السكاكين
ما يرحمه ربه اذا انه اماته
بظل انا بنتك وافخر انا مين
مهما يزيد الظيم تبقى سِماته
ترتد في ذاتي الى ان ابلغ الطين
عالي بمقداره وانا من بناته