على طاري الغرام أمسيت اهوجس فيك طول الليل
تجلّى الصبح وأنا م انجلى فكري وهوجاسي
وأنا والله م أرضى في غرامك يالغلا تبديل
علامك صرت تتجاهل غرامي يابعد ناسي
جزيت القلب بالهجران والصده بلا تعليل
وصرت اليوم للي بيننا مِنكِر ومتناسي
وأنا من سِبّة الفرقا بحالة مالها تحليل
وخايف ينقطع حبل الرجا من قلبك القاسي
دخيل اللي خلقْك وصورَك في غاية التكميل
ترى بالقلب لك حبٍّ تعدّى كل مقياسي
ترى كثر الجفا والصد يا الغالي يهد الحيل
أبيك تْكون لي في كل وقت اقرب من أنفاسي
وإذا ما كنت راغبني وناوي عن هواي تْميل
ف أمان الله وأنا عزّتي ما تعلن إفلاسي
أنا لي منزله تابا على نفسي من التنزيل
وقبل تْدندن اطبول الرحيل ابقرع أجراسي