بعض الغلا يشبه صباحات برلين
صاخب ، ومفعم بالحياة ، يتجدد
برلين ، وأنفاس الندى فجر تشرين
والشمس خجلى عن شجرها تصدد
والمعطف الشتوي دفا عنق ويدين
وبرد المشاعر .. ف العروق يتمدد
تمشي الشوارع وين مدري على وين
والغيم يحضن غيم ، قبل يتبدد
كل الوجوه اللي تبسم .. عناوين
والدرب الأجمل .. وجهةٍ ما تحدد
الناس ، والدنيا .. تمرك جناحين
وتطير عينك في السما .. ما تردد
ترمي على أول طاولة غربة سنين
يمكن كذا .. احساس الطريد المهدد !
جرب ، شعور المغترب في البلادين
شاعر ، وفي المنفى .. من العوز ندد
والقهوة المرة .. مثل طيف غالين
وأنت الوحيد .. أشلون تقدر تعدد
وقتك يمر ، وف آخر الشارع أثنين
مدري ، من الثاني ، من اللي يتودد ؟
والطاولة القصيا عليها كتابين
أديب ، شاعر ، طالب .. ولا تشدد ؟!
أحيان ما يلقى التساؤل براهين
وأحيان .. من نفسك لنفسك تسدد
لا تبتئس ، عش لحظتك ، صبح برلين
يحتاج في كل يوم تصحى .. تجدد