ليه .. شمس الغلا اللي من عيونك همى
يوم مرت على هالقلب ، والصمت طال ؟
كل بوحٍ ف صدري ظل .. وأنتِ سما
أشرقت شمس وإلا .. ما خِلق لك ظلال !
صعب أفسر شعورٍ ، ما ارتوى ولا ظما
وأجمل الحب .. ما دام الحقيقة خيال
كل ما جرّح عروقي .. وعشبه نمى
ف أنتي والورد وأعشاش الحمام احتمال
في غيابك ، جرحتي الما .. وعوٌد زمى
ما ذبحتي ف صدري ، زهرة البرتقال
لو عتابك خذا الليل .. ب " جريرة عمى "
ما أنتي اللي طعنتي الصبح ، والفي مال !
اعترف .. والمشاعر ، من غيابك .. دمى
شفتي أشلون حركتي الدمى .. بالوصال
وأعذب فصول هالدنيا ، وراك ارتمى
يوم طاح اللثام ، ولاح فصل الجمال
فارهٍ هالدلال . . وباذخٍ كلما
جيت ألملم تفاصيله ، همس لي : محال !
ما نبت ريش عصفورٍ ، ضعيف .. احتمى
من هجيرك .. ويعبث فيه برد الشمال
لكن القلب ، عن كل المواجع .. سمى
من مطر ضحكتك .. لآخر جفاف السؤال