مجنون جزئيًا وباقي بالعقل جزء ٍ قليل
يالشعر يلحسّ مخي ياأنا اللي مخّه بلحسّه
من الطبيعي الطلاسم تظهر الواضح جميل
والشعر ماهو شعر لو ماحال الشاعر متعسّه
يقول عني صاحبي مرات فهمي مستحيل
يعني معقد صعب ولازم التحق في مدرسّه
والمدرسه أستاذها خاين ولقبّ بالعميل
يهرب من التاريخ وشرحه لين يأخذه أجرسّه
هو يحسب إن الفهم أقرى وأحفظ أكتاب ٍ طويل
مايدري إن أكتابنا خلاصته في فهرسّه
درس الحياه أفضل دروس المعرفه لكل جيل
والتجربه أكبر شهاده من علوم القرطسّه
ماني مثقف حيل لكن فوق نسبة الهبيل
عاطل ولاأعمل ويعني خبرتي بالهندسّه
أعرف بأن الأرض شكل الدائره بالمستطيل
تشبه لشكل البيض لكن فرخ البيض بيفقسّه
يعني يجوز بيوم يطلع فرخ لكن له صهيل
والمشكله ماهي بصهيل الفرخ لاباض أفرسّه
وأعرف بأن الأرض فيها جاذبيه للثقيل
بس المطر كيف يتساقط مابه شي ٍ يترسّه
وأعرف بأن الحيط لو علقت به صوره يميل
لازم تحط الحيط ع الصوره وتحذر تلمسّه
وأعرف بأني شخص قاتل من يسمى بالقتيل
حتى أنا قد مت مقتول ٍ بريقه وأنفسّه
كثير أحسب كم عدد في راسي أشجار النخيل
وكل يوم يزداد العدد وسنيني اللي تغرسّه
تعبت أجمع هاجسي بأمواج من بحر الخليل
بحر الخليل اللي ورى سور الحنايا محبسّه
أحطني هنا وهنا وأرجع ألملمني وأشيل
وأنسى بعض مني تناثر في دروج الهلوسّه
فوضى الشفايف أبدعت في كذبها بحروف قيل
والحوت محد ٍ عاش في أعماقه إلا يونسّه
ياكثر مايجهل سراج ٍ يشتعل صبر الفتيل
مثل التجاهل في بيادر ياسمين لنرجسّه
أرض الكنانه نهرها عذب ٍ ويبقى الأسم ( نيل)
توت الشراب الحلو سمّم في حلاته بيّبرسّه
شفت إني واضح ياكريم العرف ولايخدم بخيل
أفتح صناديق الذهانه وأكرم اللي مفلسّه
ياصاحبي بقول لك حاجه وبعطيك الدليل
طربوشي اللي فوق راسي أبمزاجي البسّه
في واقعيتنا ترى كل شي أساسي وله بديل
يعني معي تضرب شرف وإن كان غيري تبوسّه
لاينرفزك سيف الحقيقه لو طعن صمت الذليل
أنطق بإذنك وأترك السان المهابه لأخرسّه
مؤمن بأني هايم بوادي على قول الجليل
فلا أحد يتبعني غاوي لو أجي في مجلسّه