أحبّك عتق من كسر الخواطر، من فراق الكل
واحبّك فالمطر في ساحة الشارع، وجدرانه
واحبّك مثل ريحانه سقتها امي بحب وظِل
وقلبي تربتك، وانتي بغرس الحب ريحانة
معي وجهك هُدى مادد يدينه لو دعائي ضل
شعورٍ بالوفا لا خرّ من قلبي صدى احزانه
حبيبة كل مافيني، ولا فيني، قليل ومل.!
من النظرة على عيونك وهي بالحب هيمانة
جمعنا حلم في حيّ الصباح، وبلّله بالطّل
وباقي مبسمي يذكر دفا مبسمك، وألحانه
أنا من ظِلّ، يتفيأ على اوراقي كثير.. وفَل
ووحدك من نبت في فيّتي، واتقاسم اغصانه
وانا حولك ومن حولك شعوري ماذبل أو قل
مشيت العالم المقفر غريب، وحسك ايمانه
خطاوي صمت ما تخفت معاي ولا تدوّر حل
ولا صوتي بيارق لوّحت للبحر/ والدانة
ووحدك حِل في هذا النظر، والقلب هذا حِل
هنا مرباعك اللي ما يبس نبضه ولا اشجانه
يغيب الكل من بالي، ولا تغيبين مثل الكل
معك بالي، وساحة شارعه، وظْلال جدرانه