صار الشعر

صار الشعر

رمل بقلب عشقان

لا بيهرب

ولا بيعرف يهدّي

لا صار لولو

ولا صرتْ مرجان

لا بعرفو

ولا عرفت شو بدي

لو كان نوم

ولو كنتْ نعسان

ولو كان شيطانو

إلي مخدة

رح صير ع حضورك

سطر قرآن

تا يهرب الشيطان

من حدّي

انتِ الشعر

والوزن والميزان

وظل العشق

ع الضو بتمدّي

سحرك لغز

ما بتعرفو النسوان

الله ببابل

نزلك سردة

وتَ يخلقك

كوّن سبع ألوان

ريشة و قلمْ

واستكمل العدّة

وبلّش يجرّبْ

بين انس وجان

يرسم ويمحي

وطالت المدّة

وكنتِ خيال

الخالق الفنان

وباقي الخلق

بالكون مسودّة

يا هالبعيدة

في قلب سهران

وع الشوق

صوت الليل بيودّي

نجومو كتار

بقدّهن عطشان

و عدّي...

اذا رح تقدري تعدي