هاج البحر يشكي همومو بلا حكي
متل العروس اللي غفي بجفنا البكي
و صارت رمالو تدفن سرار القلوب
و تكتب مع الموجة حروف مشربكة
و لما الشمس سكبت هموما بهالغروب
وقفنا سوی كلمن ع قلبو متكي
و متل البحر صار الحكي منا يدوب
و نهمس الكلمة بالوما بدل الحكي
مشينا و ورانا مشيت حكايا الدروب
ايدي بايدا تسرق العطر الزكي
و تنهدت خافت و شردت بالسؤال
و شفاف عم تحبس حروف ملبكة
قالت شو عندك للسمع عندي مجال
بدي حروفك ع فؤادي ترتكي
قلتلها شوفي الدني كمشة جمال
بيني و بينك بالهوی في معركة
طلي اسأليها رح بتحكي ع السريع
شو كنت حابب خبرك مني لكي