على بحرك كتبت الشعر مدري والا انا غلطان
كتبت واول حروفي نزف لك صادق شعوره
كتبت الحرف لجل انسى عذاب ولوعة الوجدان
رسمت اجمل عباراتي مع ان الروح مكسوره
ترددتي وقلتي ان المحبه لعبة الشيطان
وغبتي وقلت في نفسي اكيد البنت معذوره
رحلت بعيد مدري كيف! عشت بعالم النسيان
اغالط واقعي واضحك واقول الحال مستوره
وانا في داخلي جرحٍ كبير وكنّه البركان
وطابور الجروح يثور كلاً ينتظر دوره
رجعتي وقلتي لاتزعل ولاتشكي من الحرمان
ترى واللي خلقك اني على فرقاك مجبوره
رجعتي وقلتي لو تسمح تناسى كل شيٍ كان
ترى الاوضاع هاليومين صعبه وكلها خطوره
وانا جيتك وكلمتك صراحه كلها من شان
اقول ارجوك تنساني دخيلك وامسح الصوره
وانا مانيب حيالله ولاني جاحد او خوّان
عشان اتنكّر لحبٍ زرع في داخلي بذوره
انا نذرٍ عليّ اني اموت وسرّنا مابان
لو ان الروح من زود العذاب تموت مقهوره
قسم بالله ورب البيت واحلف لك ثلاث ايمان
ونفسي كانها تكذب عساها تموت محشوره
انا ماعندي في الجوال لا صوره ولا عنوان
لان القلب صعبه يشيل حاجه فوق مقدوره
لأني من تفارقنا رسمتك داخل الوجدان
وبالنسبه لجوالي غرْق وانمسحت الصوره