لَ تصاحب اللي في ثرى القيل مرسوم
إحذر طريقه ولا تلازم مسيره
لو كان من بيتٍ وثيقٍ ومحشوم
اغدف ثراه ولا اتّعناه خيره
احسن عن امخوته ذيبٍ وقيدوم
شهمٍ على الشدات كنه ذخيره
يفداك لو راسك على الموت محتوم
ما يصتخر حين اللواهب سعيره
وإن كان ذو فقرٍ مشاهر بلعلوم
العز ما ينشد غني من فقيره
الرب واحد والمخاليق له دوم
وكل العباد لربها مستجيره
الخوف من يومٍ به الراس مجذوم
وسط العرى واحبال وصله قصيره
يا كيف باترقى مع الحر فالحوم؟؟
واجناح طيرك فوق وكره كسيره؟!
أصبر ولو زادك من الدهر علقوم
بتعيش في خير المعزة الكثيرة
هذي نصيحة صاحبٍ عاش محروم
في ديمة الظلما تقاها منيره
ويالله طلبتك خالقي قلة اللوم
اتزيح همٍ وسط صدري مسيره
هذا أنا عبدك أناديك من عوم
أغفر لي الزله فدار الأخيره...