يا الهجوس المخملي باعذب طريف الفكر جود
انثر ابداعك بتجسيد القيم وبلا ريا
القصايد للعلوم الغانمة مثل الوقود
يا كثر ما شوشت روس الرجال الاوفيا
المكارم صرح شامخ والوفا فيها عمود
المعالي بينها وبينه تفاعل كيميا
قيمة الاخلاق محفوظة وهي دايم بزود
لو غدى لاهل الردى سلطة وكثرو الادعيا
الثبات على المبادي والوفا عند العهود
تفرق الرجل المثالي عن قليلين الحيا
التفاني في سبيل المجد دربٍ للخلود
السموءل في وفاة ابنه ترى ذكره حيا
والله ان الطيب يغني عن ملايين النقود
يجعل الانسان واحد من كبار الاثريا
الوفا عملة بها يعمل عريبين الجدود
والله ان ملاكها دايم يعيشون اغنيا
تجرةٍ ما خاب من تاجر بها وهو محسود
ربحها ربحٍ مبارك وهو هدي الانبيا
لا تقولون الوفا قفى وجا وقت الجحود
ندرة الاشيا تغليها بعين الاذكيا
والخيانة تترك الخاين عديم من الوجود
غير ذكر ابو رغال وبعض ذكر الاشقيا
الردي لو يملك الدنيا ترى ما منه فود
عايشٍ معنا ولكنه سواة الموميا