ياوجد عيني وجد من صفّ طاروق
وجاب القصايد من ورى حد الافلاك
ساق المشاعر تزدحم داخله سوق
ولافيه بيتٍ جمله حال ذكراك
أو وجد.. عودٍ لا لمح هوج وبروق
اجهش يشوف بنوضها صاحبه ذاك
عوّد عليه الشوق يا لعنبو الشوق
فقد حكيم القوم إحساس الادراك
أو وجد.. حرٍ مقيدٍ طرق بسبوق
وغيد الحباري بناظره هدّ وعراك
مافيه روسٍ تعتلي روسنا فوق
ولا ننكسر لو شفتنا نشري رضاك
عايش ياعايش داخلي نبض وعروق
بعدك ذبحني وخالقي ربّ سوّاك
انت الشموس اللي تجي صبحي شروق
وانت القمر.. يامهجتي في محياك
شف لعبتك بابا.. في مكتبي فوق
في عيني أثمن من عقارات واملاك
خذها عيوني دامك بداخله موق
خذها وخذني رح عسى العمر يفداك
مافيه أغلى بالبشر منك مخلوق
الا الذي عقب رجل حيل اغلاك
سميك اللي فطّر قلوبنا توق
بيي عسى في جنة الخلد مثواك