يا رفيق الدرب مليت من نص الطريق
طالبك تقصر عتابك ولا تشره علي
من عرف حق الرفاقه تجوّد فالرفيق
مير انا صدري ليا ضاق عرضت الخلي
ما يطفي شعلة الصدر طفاية حريق ٠
الجفا جمرٍ توهجر ونارٍ تصطلي
عرضوني للمشاريه واحساسي رقيق
ضحكة الشامت تزوّد غليل المبتلي
صاح قلبي يوم ناديتها صيحة غريق
كان ما زانت عساها يزينها الولي
لا ذكرتك يا عنود المها صدري يضيق
ضيقةٍ حطتني بموقفٍ ماهوب الي
ما تعرف القيد رجلي وانا حرٍ طليق
حملوا شرهة زهابي على متن جملي
لي رفيقٍ فالمراجل لواء مدري فريق
سيفٍ نسله مثل سيف ابو طالب علي
ابلجٍ دارت رحاته على حب الدقيق
في عيونه جمرة الطيب تطبخ وتغلي
خالدٍ بسمه وفعله على مديحي يليق
ما اطيب من المدح لا صار في راس سهلي
يابو ساره معك خمسين تفداك العليق
لا تفكر فالمقابيل والمخرج ملي
شرهة الحاظر تعلق على المجد العريق
وانت مجدك جف حبره وطرسك ممتلي
من كرم يمناك كنك على خزنة طويق
باركٍ شط الحويّر على راس الطلي