مِن يدور في حياتي ما لَقى مَعنى الخَساره
حتى نظراتي وجفوني تمتلك وجدانِ صافي
في عيوني سِحر دافي يلهب عيون السهاره
والحلا مني تِكون مسكنه حولي وضفافي
جيتِ لِك كِلي وحَرفي ما نَويت أشِن غاره
بس أحلامي.. مَدافع.. تِلتوي بَين القوافي
أبتدي نَثر المعاني بَعدما شِلنا السِتاره
لَجلِ نِبدا في وصوفٍ نجلي عَنها كِل خافي
أكتب حروفي هنيه وأكتفي بَعدِ الإشاره
بالعلومِ اللي تِبين مِن مَلامِحنا العِجافي
صار مَلعبنا سبيلٍ يسلكه نَبع القَذاره
كل واحد يتبارى ويتمادى بإنجرافي
هاذي تميل وهذا يسلب قلوب العذاره
ما بقى لِشعر موقف غيرِ صَمتٍ وانصرافي
قَل مِن بِالساحِ يِملك حَرفِ يزخر بالجَداره
يَرفض أفكارٍ دِخيله ولمبادينا تنافي
ما نِشوف إلا مَهازل والهوى قَل إقتِداره
وإن مَشينا ع الخَطيه مِني لِك هزة كَتافي
إطوي الصَفحات يالله ما على قلبك اماره
لو تَبي مِنها تِلاقي بَعضِ نفحاتٍ رهافي
مَا تِربع في حَناها غَير أضغاثِ إنهِماره
من صَحاري الحَرفِ اللي مَرها فصل الجفافي
يا خَساره لو تِغير شِعرِنا بأرض الحضاره
والوهن بان وتكون فوق سَطح الود طافي
إستمع يِمكِن تِغير نَظرتك صِدق العِباره
واتعلم شي ينفع من جَميل الشِعر وافي
الهوى نَبضه غريبة بس تِدعمها مَهاره
عَذبةٍ مثل الليالي بَلسمٍ للجرحِ شافي
ما نِقول إلا أمَلنا أول النار الشَراره
يا عسى يِصحى بَعدها كِل مِن بالشوقِ غافي
ما ابي تِشهد حروفي بَعدِ عِزه إنكساره
يمتلي حلمٍ غَمرها بإنحدارٍ وإرتجافي
يا حَسافة يوم كِلٍ مِلتهي يصدح بِطاره
والمَلا ما بين رقصٍ في رباها واصطفافي
هذا واقف في يمينه وذاك يهتف في يساره
ياه مِن ضعف المشاعر بسنا خِذلان كافي