ياما حلا الفنجال برضٍ وسيعه
ارضٍ خلا ماحولها غير الادباش
حتى المواتر والخطوط السريعه
مرتاح ماحولي له الراس ينداش
امد شوفي بالفياض وربيعه
وارقد خلا وابعد عن المدن وانحاش
ماعندي الا من يطيع ونطيعه
جفنٍ غطى والجفن الاخر له فراش
نفسه على درب الرذيله منيعه
رجال عرف وقلبه ابيض من الشاش
السر عنده حابسه مايذيعه
يعيش وسره داخل البير ماطاش
يمشي على درب الهدى والشريعه
عزالله انه رفقته تنعش انعاش
هذا شرينا رفقته مانبيعه
يعيش عالي الراس والنذل ماعاش
اللي مشى درب النذاله طبيعه
ضعيف نفس ومن يد الغير يعتاش
يرضى المهانه دام نفسه دنيعه
ياكل ويشرب سالكٍ درب الاكباش
هذاك ماليبه ولاني تبيعه
يهب يادربٍ مشى خطوة الاش