على درب الأمل غنّيت ياحرفي ثمان حروف
مثل (ضوء القمر) للي سهر لكن بدون ظلال
انا ياليل أبسري بك لو المسرى عذاب وخوف
لجل عين الوصال اللي له بقلبي غلا واجلال
أبسري والقمر كنّه جنيه الفضه الموصوف
على شال العنود اللي لها بالمكرمات وصال
ابسري والعمر يقضي وحنّا يازمان ضيوف
ولابد القمر لاطالت أيامه يصير هلال
انا ياليل لوكانت سباعك بالظلام تحوف
تبي غدر الغريب اللي حداه الوقت للترحال
تخاتلني وأنا دربي يقينه للبرا مكشوف
تبي غدري وانا ماني لها غافل طواه حيال
أباريها وأنا عيني على دربي تلد الشوف
طريقي صعب لكنّه على درب الغدر مامال
أباسج القدم وأسعى على درب الأمل واطوف
إلين أربع جهات الأرض في ثوب الذهب تختال
أبا اسج القدم ياعمري الباقي بدون احسوف
ولوجهدي غدى منّي سُدى والمعضلات جبال
كذا الدنيا كذا درب المسافر بالخطر محفوف
تجدد دورة الدنيا ولاعمره يدوم الحال
وأنا لولا (أبجدياتي) تسليني كذا وتروف
قضيت العمر ياعمري بلا صاحب يسر البال
لأن بغربتي يصعب تهجّي حرفي المكلوف
ولايقدر يترجمني سواها لادهاني حال
تجيني في معاناتي وأنا من حيرتي ملهوف
وتسقيني وانا ضامي فرات وسلسبيل زلال
صحيح أتعب أهاديها ولكنّ التعب مخلوف
ومغانيها تسليني عن الغربه سنين اطوال
وأنا حافظ عَهَدها عن عيون الجاهل الملقوف
عزيزه ماقدر يدفع ثمنها من يسوق المال
لها شكراً عدد مال الوجوه الساميات طيوف
على تسلاتها للي لقى في قربها منهال
على درب الأمل غنّيت وإيّاها ثمان حروف
على ضو (أبجدياتي) وطاب الحلّ والترحال