جِيتَ المقابر ليلةٍ ساعةَ امسيت
عسى العروق الّي بقلبي تخافي
يا اهل القبور الدّارسة ما تهنّيت
عِزّي لمن ضاقت عليه الفيافي
كم روضةٍ تحت القدم قد توطّيت
ويا هول ما بَسْمَع ميرَ الله يعافي
وقفْت والخاطر يقول انّي ابطيت
سلام يا مطوّع لو الله البلا فيّ
يا ليتني ذا الوقت للعين ما ارخيت
شفت النّصايب فوقها ذا السوافي
سلام يا مطوّع لو انك بعد ميْت
يا الله نَعِّم ذا العظام الرّهافي
يا ربّ وسّع مدخله وانزله بيت
في جنة الفردوس فانت المكافي
ارحمه يا رحمن يا والي البيت
يا ربّ حنّا لك عبيدٍ ضعافي
يا بوي ما تسمع كثير التناهيت
والنوم من عيني تجافَى تجافِي
لو كان بالمنوة مِن اوّل تمنّيت
بفديك من سيف الاجل ذا الموافي
مير العمر ما فيه فِدْوَة وتفويت
كلٍّ على ما كتب له يوافي
وصلاة ربّي عِدّ ما دفنِ من ميْت
على رسولٍ بلّغ الخير ضافي