المراجل والكرم والجود إلى حد الثماله
والصخا والطيب والترحيب والنفس الكريمه
والبشاشه والمرّوه والوفا وكل الجزاله
كلها في نجد لكن زايد ٍ فيها قصيمه
ياقصيم العز فيك الضيف والله طاب فاله
في عنيزه خصّ يلقا الضيف كل قدر وحشيمه
أستحاله فيه مثلك أستحاله وأستحاله
ياعظيمه ياعنيزه وياعنيزه ياعظيمه
ياعنيزه ياعنيزه والرشا فوق المحاله
ولاغرفتك غير من صدر القصيد ومن صميمه
شاعر وبك همت يارمز الثقافه والأصاله
وأقسم إني قبل أهيمك مالقيت اللي أهيمه
يالنفود أم الغضى فيك الهواوي راق باله
أشهد إن الحي لو ماجاك عمره دون قيمه
كم خلاوي بك يشب النار ويبهّر دلاله
ولو يمرّه ورع ينشد ماتردد بالعزيمه
ميزة أهلك ياعنيزه بالبشر كسب الجماله
وكل من يعيش بك عني أنا إنه ستيمه
كل ناسك ماتهاب إلا الولي جل جلاله
ناصرين الدين وفدوه للوطن عن من يضيمه
ياعنيزه وش يكون المجد لو مابك رجاله
ومن يكون الزين لو ماكان بك أجمل حريمه
والله إنك فوق راس الأرض تاج أنتي جماله
وأنتي ياباريس نجد الفاتنه والمستقيمه
فيك شامخ النخيل يلامس الغيم وخياله
ومستغيثك لو طلب الله رحمه جتك ديمه
عامرين بيوت ربي كل شايب مع عياله
أهل دين واهل خير وأهل طيب وأهل شيمه
البدو مع الحضر أخوان وكل ٍ في مجاله
والمحبه بينهم تزداد بقلوب ٍ رحيمه
ياعنيزه مغرمك يحذف مع الغتره عقاله
لاتذكر طيب أهلك مع لياليه القديمه
ليتني أعيش بك في أي وضع وأي حاله
حتى لو مسجون بك ومرتكب لأكبر جريمه
يكفي إني فيك عايش ياهنا العمر ودلاله
والتحف أطراف ليلك وأتنفس من نسيمه