اقبل علينا من يجمع نوايبه
يا رب تكفينا شروره ومصايبه
تخالطت ريحه وبرقه ومرعده
وأمطر علينا من مزونه وحايبه
سموه ميكونو وكنا بعزمنا
وقفة وطن واحد ونظرات صايبه
مرحب هل الوقفات ما ظرف حدهم
وفوا بفوج بشرتنا كتايبه
لجل ظفار وتوفد لها طلايع
كذلك الوسطى وما جات هايبه
ارسو مواقف سطرتها بواسل
كل يشمر عن سواعد طنايبه
وهذي عمان اللي على نهج سيدها
مع احداثها تظهر ولا كان غايبه
تسطر مواقف ينحتوها رجالها
على جبهة المجد العظيم وكتايبه
لهم في جبين المجد اشرف مكانة
لهم من مراسي الارض بصمات صايبه
لهم فالتلاحم درس اجيال تغرسه
عمان الوفا في فكر شب وشايبه
سلامي عليهم وين حلوا برحلهم
تذوب المصاعب بالعماني وموايبه
سلامي على الوقفات حن دوم اهلها
عماني وتشهد له عداه وقرايبه