حبٍ جديدٍ طوق القلب وأدماه
زوّد جروحي عقب ما كنت مرتاح
ما أسلى غياب الزين ساعه ولا أرضاه
وان غاب كنّ القلب مطعون برماح
هويت نظرة صاحبي عقب ممشاه
وحبيت زوله يوم منه العطر فاح
ياما حلا هرجه وبسمة شفاياه
وياما حلا لا من رفع كفه ولاح
أنا صويبٍ بين الأضلاع ويلاه
من نظرة المجمول زوّد بي جراح
سهرت ليلي من هموم ومعاناه
وأتابع بروق السماء كل ما لاح
كوعي غدى للرأس يا زين مركاه
متى تساعد من هو بحبكم طاح
كوى خفوقي يا ملا صدق وأعماه
عامين وأكثر ما تهنيت الأفراح
لولاه ما طبيت في الحب لولاه
لولاه ما وضحت سدي ولا أنباح
خذ ما تبي والبعد يا زين ما أقواه
أهديك قلبي والعمر لأجل ترتاح