يا بو خليفة يا زبون المخيفين
يا حاكمٍ حكمه بعز وشجاعه
فضايله عمّتْ عَلَى الزين والشين
شيخٍ على بصره طويلٍ ذراعه
مطلق يمينه بالعطا للمساكين
والكل مِنْ دوّر عطاه انتفاعه
كم واحدٍ مغتث حاله جويعين
مِنْ فَضْل زايد شبع عقب المجاعه
في بوظبي خسّر لكوك وملايين
حق البنا والكهربا والزراعه
وتنظّمت داره بحقّ وقوانين
والنفط زايد ما نقص في اندفاعه
خَلّي المجالس فاتحه للضيافين
والبّن فيها ما وقف ربع ساعه
شاعتْ اخباره في جميع البلادين
حدّث به الرّادو في كلّ اذاعه
وارخص سبيل السعر حقّ الدكاكين
كم واحدٍ فيها تربّح متاعه
والدّار داره وإِحْنا مستعدين
والحكم حكمه يعل فيه الجناعه
يعله ذرانا ظلنا فوقنا عين
ونجم النصر والعزّ فوق ارتفاعه
بحق مِنْ يعبَد ولا شافته عين
ومحمد اللي يدّعي بالشفاعه
شيخٍ ملك داره على العدل والدّين
كلٍ يلبّي له بسمعٍ وطاعه