نعمه ونستاهل سلامة زايد
بعد العلاج وطول هاي الغيبه
افراق وايّام العلاج شدايد
صابر على خبث الزمان وطيبه
قسمه من الله يوم ربي رايد
فاز ونجح زايد علاج طبيبه
الشي حق وللطبيب شهايد
والجايزه لوّل تكون نصيبه
وبصحته يفرح ونفرح وايد
ويا الله علينا تَوّله وتييبه
وشفاه والصحه كبار فوايد
ويعيش زايد بو خليفه هيبه
يدعو له الّلي فِيْ المسايد سايد
ويقول يا الله تنصره وتثيبه
ويحلم به الّلي فِيْ منامه راجد
ويشاكي الولهان ويهاذي به
الرّيس الّلي فِيْ وطنّا قايد
يعيش زايد والديار عشيبه
واكبر فرحنا يوم قالوا عايد
نرضف له الترحيب ونهلّي به
واهل الصحافه ينشرون جرايد
وفِرْح الوطن كلّه بشوف حبيبه
والهجن ضمّر والخيول تلايد
وفرسان خيل وللهجن ركّيبه
وبنات ظبيان وبنات الكايد
وبنات ذيبان وبنات الذيبه
فِ الريس ين متنافسات جلايد
ونظام زايد ما حلى ترتيبه
وبنات غضّات النهود جعايد
ويوم الفرح لعبن بنات الشيبه
كلّه على عودة سلامة زايد
وحرام نمدح شي ما ندري به