داري كل الدمع داري
وانسي شعري وانكساري
مش أنا آخر الضحايا
في الهوى، والقلب دااري
والدموع هتفيد بإيييييه؟؟
باعترف إنك بريئة
وان حبي كان حقيقة
والقدر ماهوش بكيفي
والنصيب محتاج مشيئة
انت مش
فاهماني ليه؟
يا غرام صحّى جراحي
يا سحاب غطى صباحي
كنت باحلم بيكي جنة
وردها ف كل النواحي
واللي هنعوزه نلاقيه
يا نهاية صبر عمري
يا نجوم فرحي وبدري
يا طريق ضاعت ملامحه
وانتهى مشواره بدري
والمنى
تاهت عليه
إوعي تبكي ف يوم عليا
مالك انتِ بالأسية؟
قلبي دا مفطوم عليها
دا قدر مكتوب عليا
والعذاب
واخد عليه
وفرّي دمعة عنيكي
اوعي اكون صعبان عليكي
انسي قلبي وانسي حبه
يعني هيّ جت عليكي؟
دانت أجمل
خدش فيه
جرح ايه اللي بإديكي؟
ألف جرح فدا لعنيكي
دانت كنت لقلبي دنيا
نفسه كان يعرفها بيكي
بس مش مكتوبة ليه
يعني إيه عاوزاني أسكت
وابتسم وانا قلبي ميّت
هو قلبي؟ واللا سارقه؟
واللا كنت لاقيه في ماركت؟
واللا دمعي
كتير عليه؟؟!!