والقضية والجناية
والفانلة فى الجونلة
والمخدة فى الملاية
والإدارة بالشطارة
والخسارة ع التكايا
والأمين مهلباتى
والأمانة مهلباية
والصحافة مهلبيه
والإذاعة يا ضنايا
ألف ليلة وليلة تندب
ع الهوا وتقول هوايا
والمشايخ كل شايخ
فى الفساد يهدى الهدايا
والقناعة للجواعى
والبضاعة للهبايا
والبوليس فى اليغمه طايح
بالطبنجة والعصاية
ديب غريب من غير كمامه
يهبش التوب والعباية
والقضية يا قضايا
بالمكايد والوشاية
دبروها وفصلوها
بالمقاس لبست قضايا
والعدالة بالندالة
عطلوها وهي جايه..
والحكاية والرواية
والقضية والجناية
الحكاية عايزة قعدة
والكلام مالوش نهاية
الحكاية إن البلد
مش ملك ناسها
والخلايق فى البلد
مش مالكه راسها
والبلد أصلا بلدنا
مش عليله
البلد علتها
جايه من خرسها
الحقيقة بنت كلمه
والكلام لازم يدور
سندباد مواله عالى
فى المداين والكفور
الكلام الكلام
يكسر القيد واللجام
الكلام الكلام
يدفع الناس للأمام
شوف يا صاحبي
هي كلمة دايرة ف وسط الزحام
والقضية فى النهاية
خدها منى ف كلمتين
البلد مش عايزة قعدة
وكل منهو بفتوتين
البلد عايزة المجاهدة
باللسان وبالايدين
كلنا ومن غير معاهدة
للبلد علينا دين
يكبسونا يحبسونا
يضربونا كرباجين
البلد سامعة وشاهدة
وكل خرم قصاده عين