تدرين وش هو في عيوني يخليك
اجمل نساء المجتمع ياعظيمه
غير العفاف وطهرك اللي نمى فيك
ونمّى بي افكارٍ فوارع حكيمه
ازعّلك احيان.. وانسى اراضيك
والقاك مروى في حياتي وغيمه
هتّان يسقي ارضي الجادبه ذيك
يحيي بي عروقٍ ذبالا سقيمه
ما اقول لك انتي حلالي واغليك
وكلمة احبك بالقصايد قديمه
باعصر لك النبضات في كاس واسقيك
شيٍ ما ناله ب الاناثي نديمه
كل المشاعر تزدحم جت تحييك
وبين الضلوع العوج شوفيك نيمه
آنف وادري بالعرب لي شرابيك
ولي بينهم منزال قدرٍ وقيمه
وياكبرني في عين نفسي وانا اهديك
شيخة قصيدي بالغزل ياالحشيمه
كل الشموخ اللي تشوفين يفديك
ما كنّك الا جمرةٍ في هشيمه