سلام الله لمن اسّس كيان وشيّده واعلاه
سلام الله على الصقر السعودي يوم تمجيده
سلام الله لاخو نورة على رايه على مبداه
على ذاك الزعيم اللي توحّد هالثرى بيده
وسلام الله على موطن عظيم من اوّله لاقصاه
سلامٍ كلّما ذعذع نسيم يعيد تجديده
هنا مكة هنا طيبة هنا غار النّبيّ آواه
هنا قرآننا منزل هنا صوته وترديده
هنا معزّي هنا داره هنا شعبه هنا ذكراه
هنا فالعود عودٍ ما نست الامجاد تخليده
كشف وجه الظلام اللي على العارض بدا يغشاه
وضع للملحمه خطّه بتنفيذه وتعميده
وفي ليل الذهول اللي تعب كلٍّ على مسراه
صعد طور المعالي وحده بحلمه وتجسيده
رسم من معجزات الحلم ما يلجم به الافواه
وحقق كلّ ما يحلم به الانسان ويريده
على عزمه على حزمه على فكره ونهج خطاه
ملوكٍ تاسس الارث العظيم وشعبٍ يشيده
وفي عهد المليك اللي وضع خدّ الصعاب حذاه
زمن سلمان من يبدا عظيم المجد ويعيده
مليك العزم والطاله زعيمٍ مامعاه اشباه
وريث الحزم والظفره له الحكم ومقاليده
وعلى يمناه من يطلب رضاه العالم وينصاه
ولي العهد من نوّخ قسى الوقت وثنى قيده
ومن محمد الى محمد وراية موطني تزهاه
ثلاث قرون تتباهي بمنهاجه وتوحيده
برؤية تلفت انظار الشعوب الحالمة بالجاه
تخاطف صوبها العالم يبي للعزّ تأييده
والى دارت رحى بقعاء فشعب طويق في يمناه
رجالٍ تعزف الموت وتحب لحون تغريده
نعز بطبعنا الاول وطبع الطفل من مرباه
يقدم روح لداره وكانه رايحٍ عيده
حماك الله يا اغلى بقاع وهالثرى نفداه
فداه ارواح من عاشوا على خيره وفي بيده
الا والله مافينا مروّه كان ما نحماه
وناطى فوق خشم اللي عداه اليوم ونبيده
وطنا كيف مانرخص له الروح ونضد عداه
وطنّا كيف ما نفدى ثراه وحن مواليده