عزّ الله انّي متمّم فيه ومْوفّي
حق الصحيب الذي صدّ وْ بدا ميله..!!
ومن عادتي.. ماتْبع اللي صدْ ومقفّي
واللي تخيّر بديلي.. حان تبديله..!!
هدّ العهود القديمه وانهدم صفّي
واوحيت خلفي صفوف المجد تنعي له
ولاقيت منهو تصافق كفّه بْكفّي
صان العهود وْ صعيب الامْر يثني له
كم فيه شعري يشبّ النار ويْطفّي
اعزف له الذنب ويحرجني بترتيله..!!
والا الذي راح ما لبّى معه شفّي
مانيب في حاجته والقلب داعي له
الله يوفقْه ولو هو راح متخفّي
ما ظنّي انسى مواقفْه وْ مراجيله..!!
يا رِجْل عن دربهم وبيوتهم.. خفّي
ويا قلب لا تتعب اللي عذّبه ليله..
ما دام انا في عهوده صادق مْوفّي
لا عاد تتعب وريدي.. لا تنادي له..!!